ប្រវត្តិទស្សនាវដ្ដីធម្មចក្រ

ប្រវត្តិសង្ខេបទស្សនាវដ្ដីធម្មចក្រ

ការដែលមានឈ្មោះ ”ទស្សនវដ្ដីធម្មចក្រ”ថ្លោឡើងនៅក្នុងចំណោម សិក្ខាកាមជន​ខ្មែរ​នៅប្រទេសថៃក៏មកពីការយល់ត្រូវរបស់ប្រធានសមណនិស្សិតបរទេស ដែលមាន​ចេតនា​​ដ៏ឧត្តុង្គឧត្តមក្នុងការពង្រីកក៏ដូចជាពង្រឹងបន្ថែមទស្សនៈនៃការគិតទស្សនៈនៃការ​សរសេរ​​​និងទស្សនៈ​នៃ​ការ​​ផ្សព្វផ្សាយ ឲ្យមានភាពស្ទាត់ជំនាញឡើង ក្នុងការសិក្សាស្រាវជ្រាវ​នូវផ្លូវលោកក្តី ផ្លូវធម៌ក្តី ជា​ពិសេសអក្សរសាស្រ្តនិងអក្សរសិល្ប៍ខែ្មរ ព្រមជាមួយ​នឹង​ព្រះ​ពុទ្ធ​សាសនាឲ្យចូលទៅ​អភិវឌ្ឍន៍​​ចំពោះខ្លួនឯងនិងជ្រួបជ្រាបទៅក្នុងសង្គមខែ្មរយើងផងគ្រប់ៗ​សមាជិក​​ទាំងអស់​ក្នុង​មូល​និធិពុទ្ធិកសិក្សា ។
ក្រោយអំពីការត្រួតពិនិត្យសៀវភៅវប្រវត្តិព្រះពុទ្ធសាសនានៅអាស៊ី ព្រះអង្គកក៏មានថេរ​ដីកា​កោះហៅប្រជុំសមាជិកទាំងអស់ហើយស្នើឡើងនូវវត្ថុបំណង ដូចជាបានពោលមក​ហើយ​នោះ​ គឺដើមឡើយព្រះអង្គសំណើរឈ្មោះថា “ទស្សនាវដ្ដីសិក្ខាល័យ” តែភាគច្រើនក្នុងក្រុមកក៏បាន​ផ្តល់​យោបល់ល្អ ៗ ទាក់ទងទៅនឹងព្រះពុទ្ធសាសនា គឺគោលដៅសមាជិកទាំងអស់នេះធ្វើការ​ដើម្បីបម្រើព្រះពុទ្ធសាសនា និយាយឲ្យចំគឺការផ្សព្វផ្សាយធម៌នៃព្រះពុទ្ធសាសនាតែម្តង ដូច្នេះឈ្មោះសិក្ខាល័យក៏ត្រូវបានផ្លាស់ជា “ធម្មចក្រ”វិញ ព្រោះធម៌ដែលព្រះពុទ្ធសមណគោត្តម​យើង​ទេសនាមុនដំបូងបង្អស់ គឺធម្មចក្កប្បវត្តនសូត្រនេះឯង ដើម្បីឲ្យសមស្របទៅតាម​ព្រះធម៌​និង​កាលៈទេសៈ ហើយសមាជិកទាំងអស់ក៏ដាក់ឈ្មោះថ្មីឡើងវិញគឺ៖ ទស្សនាវដ្ដី “ធម្មចក្រ”ដូច​បាន​រៀបរាប់មកនេះ។
ខ្លឹមសារនៃការសរសេរនិងផ្សព្វផ្សាយទស្សនាវដ្ដីនេះ គឺភាគច្រើននិយាយអំពីការសិក្សា​ទៅ​តាម​គោលធម៌នៃព្រះពុទ្ធសាសនា ហើយសកម្មភាពនៅក្នុងមូលនិធិពុទ្ធិកសិក្សាមាន​ខ្លឹម​សារ​មានជាអាទិ៍ ដូចជា៖
១.ពុទ្ធប្រវត្តិ
​២.ប្រវត្តិនៃព្រះពុទ្ធសាសនា
​៣.ការសិក្សាទូទៅនិងសង្គម
៤.ប្រពៃណីនិងទំនៀមទម្លាប់ខ្មែរព្រមទាំងសាសនពិធីផ្សេង ៗ
៥.កំណព្យកំសាន្ត
៦.ប្រវត្តិវត្តនិងភូមិស្រុក ។

វត្ថុបំណង

ទី១ ដើម្បីជាវេទីនៃការសិក្សារបស់សមណនិស្សិតខ្មែរ ​។
ទី២ ពង្រឹងពង្រីកព្រះពុទ្ធសាសនានិងអក្សរសាស្រ្ត អក្សរសិល្ប៍ខ្មែរ ។
ទី៣ ដើម្បីផ្សព្វផ្សាយព្រះធម៌និងវប្បធម៌ប្រពៃណីខ្មែរឲ្យបានទូលំទូលាយសាយ ។
ពោលដោយសរុប ទាំងអស់នេះហើយគឺដើម្បីសេចក្ដីសុខនៅក្នុងធម៌តែម្យ៉ាង ដោយ​ឥតមានការពាក់ព័ន្ធ​ដល់នយោបាយឬមាគ៌ាណាខុសនឹងគន្លងធម៌វិន័យជាដាច់ខាត ។ ​ទស្ស​នា​វដ្ដី​ “ធម្មចក្រ” ឥតមានរើស​អើង​នឹងវណ្ណៈឬជាតិសាសន៍ណាមួយឡើយ ។